Լսողական խանգարումների վաղ ախտորոշում

Մանկական հասակում լսողական խանգարումների վաղ և ճշգրիտ հայտնաբերումը անհրաժեշտ նախա­պայման է հանդիսանում համապատասխան թերա­պևտիկ բուժման և վերականգնողական միջոցա­ռումներ իրականացնելու համար: Երեխայի լսողու­թյան և խոսքի զարգացման համար անհրա­ժեշտու­թյուն է առաջանում լսողական ուղու ձևավորման զգացողական փուլում ախտորոշել լսողական խանգարումները և համապատասղան բուժում իրականացնել:

Ինչպես հայտնի է, մինչև 3 տարեկանը ավարտվում է լսողական ուղու ձևավորման զգացողական փուլը և խոսքի զարգացումը ու լսողական համակարգի կենտրոնական հատվածը կորցնում է իր նեյրոնալ ճկունությունը:

Վաղ մանկական հասակում կարող է հանդիպել լսողական օրգանների բոլոր հատվածների (և պերիֆերիկ, և կենտրոնական) ախտահարումներ:

Էրեբունի ԲԿ-ի ՔԿԱ հիվանդությունների բաժնում 1992 թվականից իրականացվում է լսողական հե­տազոտություններ: Մեր կողմից որպես օպտիմալ տարիք վաղ, ճշգրիտ և վերջնական ախտորոշման համար ընդունվում է 6-7 ամսական հասակը, քանի որ մինչ այդ յուրաքանչյուր երեխա հետազոտված կլինի նորածնային սկրինինգի երկու էտապներում, որը սկսվել է 2008 թվականից և շարունակական բնույթ է կրելու:

Էրեբունի ԲԿ-ի ՔԿԱ հիվանդությունների բաժնում հետազոտվել են 66 երեխա, որոնց հասակը եղել է 1 օրականից մինչև 2 տարեկանը: Հետազոտությունները կատարվել են հետևյալ եղանակներով`

Սուբյեկտիվ.

1. ռեֆլեքսաուդիոմետրիա` նորածնային հասակից սկսած,
2. պահվածքային աուդիոմետրիա` 3-4 ամսական հասակից սկսած,

Օբյեկտիվ.

1. օտոակուստիկ էմիսիայի գրանցում,
2. կարճ լատենտային լսողական հարուցված պոտեն­ցիալ­ների գրանցում,
3. տիմպանոմետրիա,
4. ակուստիկ ռեֆլեքսի գրանցում:

Հետազոտված 66 երեխաներից նորմալ լսողություն է գրանցվել 27-ի մոտ, 15-ի մոտ հայտնաբերվել է II-III աստիճանի սենսոնևրալ ծանրալսություն, 10 երեխայի մոտ ախտորոշվել է IV աստիճանի սենսոնևրալ ծանրալսություն, 13 երեխայի մոտ` կոնդուկտիվ ծան­րա­լսություն, 2 երեխայի մոտ` աուդիտոր նեյրո­պաթիա, 1 երեխայի մոտ` լսողական ուղու կենտ­րո­նա­կան ախտահարում:

Անհրաժեշտ է նշել նաև, թե որ տարիքում է հնարա­վոր կատարել վերջնական ախտորոշումը: Մինչև 6 ամսական հասակը հետազոտված երեխաներին կատարվել է նաև հետազոտոթյուն 6-7 ամսական հասակում: Առկա է նախնական և վերջնական ախտո­րո­շումների միջև մոտ 20 % չափով տարբերություն, 7 երեխաների մոտ մինչև 6 ամսական հասակը օտոակուստիկ էմիսիա չի գրանցվել, տիմպանո­գրամ­ման եղել է B տիպի, ակուստիկ ռեֆլեքս չի գրանցվել և ախտորոշումը վերջնական չի եղել, իսկ 7 ամսա­կանում` էմիսիան գրանցվել է, տիմպանոգրամման` A տիպի և նրանց մոտ ախտորոշվել է նորմալ լսողություն: Վերոհիշյալ արդյունքները հավանաբար պայմա­նավորված են եղել թմբկախորշում լորձա­թաղանթի գերաճի առկայությամբ:

Այսպիսով, ՀՀ-ում նորածնային սկրինինգի համա­կար­գի ներդրումը և կատարված հետազոտությունների արդյունքները հնարավորություն կընձեռեն երեխա­ների լսողական խանգարումների վերջնական ճշգրիտ ախտորոշումը մոտ ապագայում իրականացնել արդեն 6-7 ամսական հասակում:

Հարցեր, պատասխաններ, մեկնաբանություններ